روجينا ترد على ناقد فني هاجم مسلسلها

خلال استضافتها ببرنامج “الراديو بيضحك” الذي تقدمه المذيعة فاطمة مصطفى على “الراديو 9090″، علقت الفنانة روجينا على أزمتها مع الناقد الفني طارق الشناوي بسبب مسلسل “سر إلهي” الذي عرض ضمن السباق الرمضاني الماضي، وأقام زوجها الدكتور أشرف زكي، دعوى قضائية ضده بسبب مقال كتبه عنها.

وقالت روجينا: “لم أتضايق نهائياً واحترمت نقده، ولم أخرج للرد عليه وأحترمه جدًا، ولكن هو قال (هي قدمت ثلاثة مسلسلات لها) ودا رابع تجربة ليا فمعنى كده إن هو متفرجش من الأساس، واستنيت يقول عملت الشخصية بطريقة مش حلوة، كنت كده هحترمك بس كده هو قال رأيه، ورأيه هو حر فيه ولكن مشكلته مع أشرف زكي وبينهما القضاء، وأنا بعيدة عن المشاكل لأني أحب الهدوء النفسي.

وعن سبب تعرضها لحروق في وجهها خلال الفترة الماضية قالت روجينا: “قضيت أسوأ عيد في حياتي وروحت أصيف وقولت عاوزة آخد لون ولكن محستش وأنا قاعدة في الشمس، وفجأة روحت لقيت وشي ورم وشوفت أيام صعبة في الساحل، ومكنتش لاقية مكان فيه حقن آخدها، شغلتنا الوش فيها رأسمالنا، والناس قالوا حقنت وشها وكل واحد بقى بيطلع يقول رأيه، والناس بقت تفتي كتير أوي”.

تابعت: “مايا بنتي بتقولي مش هشتغل معاكي ودا مزعلني، منها وهي مساعد مخرج ومن أهم الأسامي، ولكن خايفة تكبر ومترضاش تشغلني معاها، وكنت بتخانق مع مريم بنتي في سر إلهي، ورؤوف عبد العزيز كان دايمًا يقولي ابعدي عنها، ومريم مش أول تجربة ليها وهي ممثلة شاطرة”.